پاسپۆرتی ئەڵمانی (Einbürgerung): مەرجەکان دوای یاسا نوێیەکە

• لە ٢٧ی جوونی ٢٠٢٤ەوە: ئیتر پێویست ناکات واز لە ڕەگەزنامەی پێشووت بهێنیت. دوو ڕەگەزنامەیی ڕێگەپێدراوە. (ئایا وڵاتەکەی خۆت ڕێگە دەدات یان نا، بە یاسای ئەو وڵاتە بەندە.)
• لە ٣٠ی ئۆکتۆبەری ٢٠٢٥ەوە: ڕێگای خێرای سێ ساڵە لابرا. ئێستا بۆ هەمووان لانیکەم پێنج ساڵە. ئەو داواکارییانەی پێشتر درابوون، ئەوانیش بە یاسا نوێیەکە دەپشکنرێن.

• پێنج ساڵ ئیقامەی یاسایی لە ئەڵمانیا.
• ئیقامەی گونجاو: ئیقامەی دائیمی، Blaue Karte یان هەندێک ئیقامەی کاتی؛ بۆ نموونە § 25 Abs. 1، § 25 Abs. 2، § 25a و § 25b. بە Duldung نابێت.
• ناسنامەی ڕوون: زۆرجار بە پاسپۆرت یان بەڵگەنامەی فەرمی.
• خەرجیی خۆت و خێزانەکەت بێ Bürgergeld یان یارمەتیی کۆمەڵایەتی.
• زمانی ئەڵمانی لە ئاستی B1.
• دەرچوون لە Einbürgerungstest (١٧ وەڵامی ڕاست لە ٣٣ پرسیار).
• پابەندبوون بە دەستوور (freiheitliche demokratische Grundordnung) و واژۆکردنی ڕاگەیەندراوەکە.
• سزای تاوانت نەبێت. سزا زۆر بچووکەکان زۆرجار حساب ناکرێن.

ئەگەر Bürgergeld وەردەگریت، لەم حاڵەتانەدا هێشتا دەکرێت:

• لە ٢٠ مانگ لە دوایین ٢٤ مانگدا کاری فوڵ‌تایمت کردووە و تەنها یارمەتیی تەواوکەر وەردەگریت. هاوسەرەکەشت (ئەگەر پێکەوە دەژین و منداڵێکی ژێر ١٨ ساڵتان هەیە) دەتوانێت ئەم ئیستیسنایە بەکاربهێنێت.
• کرێکارە میوانە کۆنەکان (Gastarbeiter) و Vertragsarbeiterی ئەڵمانیای ڕۆژهەڵات، بە مەرجی تایبەت.
• ئاگاداربە: لە چاکسازیی یاسای ٢٠٢٤ەوە، نەخۆشی، کەمئەندامی یان دایک/باوکی تەنها بوون ئیتر خۆبەخۆ ئیستیسنا نییە. تەنها لە حاڵەتی زۆر تایبەتدا (Härtefall) لەوانەیە فەرمانگە چاوپۆشی بکات. ئەگەر لەم دۆخەدایت، پێش داواکاری بێگومان لەگەڵ ناوەندێکی ڕاوێژ قسە بکە.

تەنها ئەگەر پەنابەریی سیاسی یان پاراستنی نێودەوڵەتی (ژنێڤ یان Subsidiär) ت وەرگرتبێت، ماوەی دۆسیەی پەنابەری لە پێنج ساڵەکە حساب دەکرێت. بۆ کەسێک کە بۆ نموونە بە Duldung و دواتر § 25b ئیقامەی وەرگرتووە، ماوەی دۆسیەی پەنابەری حساب ناکرێت.

منداڵانی ژێر ١٨ ساڵ زۆرجار دەتوانن لەگەڵ دایک یان باوک پاسپۆرت وەربگرن، تەنانەت ئەگەر خۆیان پێنج ساڵی تەواویان نەبێت.

بۆ هەر کەسێکی گەورە ٢٥٥ یۆرۆ و بۆ هەر منداڵێک کە لەگەڵ دایک یان باوک پاسپۆرت وەردەگرێت ٥١ یۆرۆ.

ئامۆژگاری: داواکارییەکە بدە بە Einbürgerungsbehörde ی شارەکەت، نەک Ausländerbehörde. لە زۆر شاردا داواکاریی ئۆنلاینیش دەکرێت.